رواية طويلة ((بشروة أني أبرحل))ليست لضعاف القلوب

هذي القصة انتشرت وحبيت انقلها لكم اذا ما قرأتوها قبل كذا ولكن القصة طويلة جدا ومحزنة جدا جدا والجميع سوف يبكي في نهايتها يالله نبدأ
الجزء الأول:
ضاحي ابو ناصر: يالله ياعيال ...يالله نتعمر عمرة الوداع ورانا درب للكويت...وودي اواصل ...
ام ناصر: يالله يامها قومي بسج نوم ...قومي ساعديني على الاغراض
مها وهي على فراشها: يمه مالي خلق ابي انام شوي ......تو الناس لاحقين
ابو ناصر: مها يابوج متى بتخلين نوم الظهر هذا اللي يتعب الجسم ؟....قومي يالله عاوني امج
وفي المغرب تجهزت العائله الكويتيه اللي كانت في زياره للاراضي الطاهره ........وفي طريقها للكويت......
الطريق كان طويل ...وقطعوه بالسوالف والضحك .....



مرت الساعات ثقال وحس ابو ناصر انه تعبان خصوصا انه ماعنده ولد كبير يسوق عنه....لكنه ضغط على روحه علشان عياله اللي اشتاقوا لديرتهم واصدقائهم...
الساعه 1 في الليل .....
ام ناصر: مها روحي ورى عند الاغراض وسوي صمون وجبن لاخوانج والله مافيني حيل
مها: خليهم يولون توهم ماكلين شيبس وبيبسي
ابوناصر: أي والله روحي سويلي انا بعد مشتهي صمونه وجبن من ايدج
مها: خلاص زين.... بس عشانك
سوت مها لاخوانها وابوها الصمون ونامت ورى بالسوبرمان
صارت الساعه 3 وابو ناصر ينعس بشده وماهو قادر يشوف الطريق والعيال كلهم ناموا ....حس الدنيا ظلمه جدامه ....
انحرف عن الطريق ومالت السياره حاول انه يسيطر على الموقف وداس على البنزين بقوه وكان هالشي مو من صالحه لانه فقد السيطره وانقلبت السياره عدة مرات ..........وكان حادث مأساوي
مضت ثلاث ساعات وكان الشارع فاضي ....ابوناصر وام ناصر والولد الصغير اللي كان بحضن امه على طول توفوا اما الاولاد الاثنين الباقين فكانت حالتهم خطيره ....ومها كانت بغيبوبه والله العالم بحالتها ....
مرت سياره من مكان الحادث كان شاب وهو اللي بلغ عن الحادث وشاف مها على بعد خمس امتار من مكان الحادث وكانت جنطة الملابس الكبيره على رجولها ...حاول هذا الشاب انه يساعدها ورفع الجنطه عنها .....فيها نبض ...وصلت سيارات الاسعاف.....لكن متأخره وماتو الولدين وهو في سيارة الاسعاف
وعت "مها" بنفسها بعد غيبوبه دامت اسبوعين لقت اجهزه التنفس حولها والشاش مغطي جسمها وهي في قلبها تقول :"ياربي شصار؟ كل عظمه بجسمي تعورني !وين اهلي؟؟" ولما التفتت يمين لقت حرمه بجنبها كانت مها ودها تكلم بس الكلام ماهو قادر يطلع منها ...
سبقتها الحرمه وقالت : الحمدلله على سلامتك يابنتي انا فاطمه وبنتعرف على بعض اكثر لما تلطلعين بالسلامه انشالله ...
في هذه الاثناء دخلت الممرضه المصريه : الحمدلله على السلامه يا مها ايه الجمال ده الله الله اليوم وشك منور
تطالعها مها ونظراتها كلها تقول شالسالفه حاولت تنطق تكلمت وبصعوبه : سستر ..وين اهلي...؟؟؟
الممرضه والحيره بوجهها وعلامات الارتباك باينه عليها : هم اهلك !!!حيكونوا بخير طبعا ؟؟انتي خايفه ليه؟
تكلمت الحرمه اللي كانت قاعده : يابنتي يامها انتي عارفه ان الحادث اللي صار لكم مو سهل وهلك مثل حالتك
مها: يعني شنو؟ اهلي فيهم شي شصار بالضبط وانا اللحين وين؟ "كانت مها في قمة توترها"
فاطمه: انتي اللحين في الرياض ...
مها:وشجابني للرياض ؟ اذكر ان الحادث صار في منطقه بعيده عن الرياض !!!! زين وين اهلي وين امي وابوي واخواني
فاطمه: قلتلك اهلك مثل حالتك صدقيني وانشالله تشوفينيهم بس مو ألحين
مها : ومتى اقدر اشوفهم؟
فاطمه: لما تتحسن حالتك وتبقي اقوى من كذا ؟
مها: زين منو انتي ؟
فاطمه:قلتلك انا اسمي فاطمه اخت فيصل الشاب اللي جابك لحد هنا واذا تبغين.....أي شي اطلبيه مني واعتبريني زي اختك
مها: انتي متأكده ان اهلي مافيهم شي ....
فاطمه: مها انتي تعبانه الحين ارتاحي خصوصا انك طايحه بغيبوبه من اسبوعين ...ريحي نفسك ولاتفكري كثير
سكتت مها وبداخلها خوف كبير بس الالام اللي بجسمها خلتها ماتفكر اكثر الا بنفسها....
خوال مها كانوا كلهم مسافرين لسوريا اصلا هم مجرد ولدين وبنت وعلاقتهم مقطوعه معاهم من زمان لخلافات كبيره بينهم وكان ابوها وحيد امه وابوه اللي ماتوا من زمان يعني ماسأل عنها احد ولا اهتم فيها أي مخلوق، غير فيصل اللي نظر للموضوع نظرة تعاطف مع هالبنت كان فيصل على قد الحال نقدر نقول اقرب للفقر منه للغنى.
وهو اللي وداها مستشفى قريب بس المستشفى للاسف كانت امكاناته محدوده بلغ الجهات المختصه وفهمهم ان هو قادر يسفرها للرياض ويدخلها مستشفى خاص ونظرا لان حالتها خطره وماتسمح الانتظار مافكروا كثير ووافقوا بسرعه لان اذا طولوا ممكن تروح فيها البنت، سفرها فيصل للرياض على حسابه الخاص
ولما وصل الرياض اخذ سلفه ودخلها مستشفى"دله"الخاص ووقف معها الرجال وقفه مايوقفه احد.
بعد اسبوع : كان الحاح مها على الممرضه كبير ...ودايم تسألها عن اهلها ...
مها: انتي ليش ماتخليني اروح لاهلي واتطمن عليهم ؟
الممرضه: انتي لسه تعبانه ...تتحسن حالتك انشالله وانا بنفي حوديكي ليهم
مها: سستر انا حاسه بشي مو زين قوليلي اهلي فيهم شي...
وفي هذي اللحظه يدخل الدكتور السعودي اللي كان مدين....
الدكتور: الحمدالله على سلامتك يااخت مها ....ابشرك انك اللحين تعديتي مرحلة الخطر وحالتك مستقره
مها : دكتور ممكن اعرف شصار لامي وابوي واخواني

مها : دكتور ممكن اعرف شصار لامي وابوي واخواني
الدكتور: صح انتي لازم تعرفين عاجلا ام اجلا وان ماعرفتي مني بتعرفين من غيري
مها: .................
الدكتور: اول شي الله سبحانه وتعالى قال في كتابه الحكيم" كل نفس ذائقة الموت" ....خلي ايمانك بالله قوي وهذا القضاء والقدر واللي كاتبه الله ليكي ولغيرك
مها: دكتور انت شتقصد ...اشوفك تطري الموت
الدكتور وهو واقف: الموت حق علينا وعظم الله اجرك بوالديك واخوانك
مها مصدومه من اللي تسمعه: يعني.....اهلي ماتوا .....انت شقاعد تقول .....اهلي لا ماماتوا انت تجذب علي
الدكتور: ........
مها: سستر قولي شي...انتي قلتيلي ان انتي بنفسك بتوديني لهم
انهارت مها بالبكاء واغمى عليها ...عطاها الدكتور مهدئات .....
"أي احد مكانها بيكون عارف بشنو هي تفكر وشنو مدى الجرح اللي هي تحسه والحزن اللي عايشه فيه
فاطمه: البنت صح مسكينه وتكسر الخاطر بس انت ليه تسوي كل هذا ؟
فيصل:والله يافاطمه ماعندي علم ؟ بس البنت مسكينه ومالها احد في المملكه وانا بغيت الاجر
فاطمه: يعني لوكانت مزيونه قلنا حبيتها بس البنت ملامحها موباينه للحين كل وجهها كدمات وجروح؟
فيصل: هههههه ياشطنك يافاطمه وشتبين توصلينله معنى كلامك اني ساعدتها لغايه في نفسي ؟
فاطمه:مدري يافيصل احس مافيه سبب تساعدها وانت ماتقدر بلغ السفاره الموجوده هنا وهم بيساعدوها اكيد
فيصل: فاطمه انا بديت بهالشي وانا اللي انهيه ..خلاص انا طالع بغيتي حاجه
فاطمه:سلامتك ياخوي بس وين رايح؟
فيصل:رايح المستشفى......اشرايك تروحين معي؟
فاطمه:قول كذا من الاول !اكيد اروح معك اجل ها اخليك لحالك لاياحبيبي ....الا صحيح انا سمعت من الممرضه ان الدكتور خبرها عن اهلها السبت اللي طاف وانا لما كنت عندها كانت على طول نايمه وماتحس بأحد
فيصل: لاحول ولا قوة الا بالله...... الله يكون بعونها انشالله .....حاولي انك تخففي عنها
يطلع فيصل وهو يقول :خمس دقايق اذا ماجيتي انا ماشي ...)
وتلبس فاطمه عبايتها وغشوتها وتلحق باخوها ويطلعون للمستشفى .
وفي المستشفى يطق الباب على مها ..
مها بصوت متحشرج مبحوح: منووو؟
فاطمه وهي تدخل :انا فاطمه ممكن ادخل ؟
مها: هلا فاطمه
فاطمه: الحمدلله على سلامتك ......
مها: ......................
فاطمه : انا عارفه ان اللي حصل ليكي ماهو قليل بس الله موجود يامها
مها تبكي .....
فاطمه: بس يامها خلاص اللي راح راح والحي ابقى من الميت
مها: اهلي يافاطمه شلون ماابجي عليهم وانا مالي غيرهم؟
فاطمه : طيب امسحي دموعك لان في ضيف يبغى يشوفك
مها باستغراب: منو هالضيف؟
فاطمه وهي تقعد على السرير: اخوي فيصل سبق وقلتلك عنه !!هو اللي ساعدك
مها: ايه تذكرته حياه الله انا بعد حبيت اشكره
فاطمه وهي طالعه تنادي اخوها من عند الدكتور اللي كان يسأل ويكمل باقي الاجراءات معه ..
ومثل ماتعرفون في الكويت الغشوه شي مو اساسي علشان كذا لبست مها شيلتها بس .
طق فيصل الباب ودخل .سلم على مها وتحمدلها بالسلامه ماقدر يرفع عينه ويناظرها كان مستحي ومو متعود يشوف وحد مفرعه
مها بنبرة حزن: انت اكيد فيصل اللي ...اللي... وبكت بكى يقطع القلب
انتبه فيصل ورفع راسه وليته مارفع شاف قمر يبكي حاول انه يتكلم لكن انبهاره فيها كان اكبر من انه ينطق يقول بقلبه: حشا ماهي انسانه الا ملاك لا اله الا الله . وأخيرا تداركت فاطمه الموقف : اذكري الله يامها لا تتركين الشيطان يضحك عليك لا تصيرين ضعيفه،،،،قول شي يافيصل ؟؟؟؟
فيصل مثل المنبله: هاه صح لا يامها لاتصيرين ضعيفه هذا تصرف غلط اهلك ماتوا الله يرحمهم هذا المكتوب ادعيلهم الرحمه
مها وهي لاتستطيع ان توقف دموعها : بس هذيل اهلي تعرفون يعني شنو اهل يعني الدنيا كلها وين اروح عقبهم؟منو يقبلني ؟خوالي احنا على خلاف معاهم ومااظن يقبلوني وابوي وحيد اهله اللي ماتو من زمان ماتقولون لي وين اروح انا هني(هنا)مثل الغريبه مالي احد
فيصل:افا عليكي يامها واحنا وين رحنا والله لاصيرلك اكثر من اخ وسند وعون انشالله..
مها وهي تمسح دموعها : اكثر من اخ ؟؟؟ فيصل انا حبيت اشكرك من كل قلبي على انقاذك لي وهذا فعلا كان عمل انساني منك انا اشكرك لانك تستحق الشكر في نظر الناس لكن انا اعاتبك . " تبكي " .ليش ماخليتني اموت معاهم ؟؟
فاطمه وهي تقرب من مها وتضمها : مها حبيبتي بسك عاد يمكن الله له حكمه في اللي صار وانشالله امورك تتحسن وماتدرين عن المكتوب؟
مها: ونعم بالله !!! فيصل مابي اكون وقحه وجريئه معك بس ممكن طلب؟
فيصل : افا والله يامها انتي تامري ماتطلبي
مها: تسلم بس انا ابي ارجع الكويت
فيصل يرتبك ويحاول يخفي ارتباكه: الله يهديكي بس الزم ماعليكي راحتك وانا اخوك وبعدين يحصل خير
مها: ماتقصر بس انا حاسه بتحسن شوي ...اقول اخ فيصل ..انا سمعت ان هذا المستشفى خاص وتكلفته كبيره وانا ماودي اثقل عليك
فيصل وهو يقوم وماوده اصلا يقوم: يابنت الحلال لاتشيلين هم شي اللحين انا اللي ادفع والا انتي ..آيالبخيله؟؟
مها: بخيله! انا مو بخيله من قال؟؟؟؟؟؟؟
فيصل: هههههه حطي نفسك مكاني وش تسوين
مها : مدري!!!!!!
فاطمه: مو كأنكم نسيتم وحده ضعف اعماركم وراها عيال وبيت ومجابلتكم ؟
حس الاثنين ان فاطمه تجمعهم بالكلام وكأنهم يعرفون بعض من زمان بس كان شعور غريييب
فيصل: ماعاش من ينساكي يافطوووم بس يالله عاد مشينا ثقلنا على البنت وهي تعبانه
يطلعون من عندها وترجع مها للحزن وللمراره والكأبه والدموع اللي بعدها ماجفت وترجع فاطمه لبيتها وعيالها ويروح فيصل بأفكاره يفر شوارع الرياض ويدور براسه هالحوار:
والله انها قمر احلى بنت شفتها بحياتي..هو انا من كثر ماشفت بنات...بس عن جد حلوه رغم اثار الجروح بوجهها وانها مكسره بس فيها براءه عجيبه يحليلها والله انها حبيبه..... مسكينه هالبنت.....
عجبته مها ببياضها وعيونها الحلوه سود ووساع خشمها الدقيق متوسط الطول فمها المليان ...ناعمه وحلوه ...رغم انه ماشاف شعرها بس للعلم كان شعرها اسود طويل ناعم يغطي نص ظهرها وجسمها قبل الحادث كان مليان شوي بدون ترهلات

وعقب الحادث والمأساة اللي صارت فقدت الكثير من وزنها..مايحتاج اقولكم عمق المأساة اللي كانت فيها مها ومدى الالم اللي تعيشه والجرح اللي تشيله كان كفيل انه يعيشها الحزن مدى الحياه كانت تدعي على نفسها وتمنت انها ماتت معاهم بعدين ترجع وتحسر ....اكيد كان الشعور الطاغي ...الغربه
فيصل شاب في مقتبل العمر 23سنه اهله عايشين في منطفه تبعد عن الرياض حوالي 250كم وهو لظروف شغله كان ساكن عند اخته بالرياض اللي عايشه عند زوجها اللي هو ولد عمها وفيصل ساكن عندهم . فيصل شاب ماعليه كلام في الجمال وطبعا الرجال بشخصيته وافعاله بس هو فعلا كان جميل :طويل ضعيف اسمرمو كثير شعره اسود كثيف ناعم طويل لحد ما.له شوارب ولحيه خفيفه .فاطمه هذي اخته وعمرها 35سنه متزوجه ولد عمها نواف اللي يموووت فيها لانها وبجداره جابتله 6عيال الله يخليهم لها وبنت صغيرونه هي اللي مدلعه بالبيت كله اسمها اميره وعمرها ثلاث سنوات .
فيصل وهو داخل بيت اخته:السلام عليكم
فاطمه اللي كانت ترقد بنتها بالصاله : وعليكم السلام والرحمه هلا والله بروميو كيف الحال ياعنتر هلاوغلا بقيس
فيصل:ههههه قيس وعنتر وروميو من بقى من العشاق ..يالله انا اخليك تعبان وبروح ارقد
فاطمه: ماالومك تعبان من التفكير بست الحسن والجمال !!!!!!!
فيصل وهو يقعد في الكنبه اللي مقابلتها والظاهر ان الموضوع شده: فطمطم شقصدك ياحلوه؟؟؟؟؟؟؟
فاطمه: والله محد فاهمك كثري يافصيل ماخبرتك تهتم بالبنات ولاانت براعي سوالف خرابيط ...لا وصايرلي حاتم الطائي
فيصل وهو يتنهد: اكيد تقصدين مها
فاطمه:شوف ياخوي انا مو ضد فعل الخير والبنت انا معاك انها مسكينه بس انت سويت اللي عليك وكفايه عاد تحمل نفسك ديون انت منت قدها ياخوي ارحم بحالك الدين يكسر الظهر وانت منت بقده
فيصل: انا رجال ومتحمل اللي يصيرلي ليه شايله همي؟
فاطمه:انا اختك ومن حقي اشيل همك واشوف ان هالشي يضرك اكثر من انه ينفعك
فيصل يفكر: طيب شتشورين علي ياوخيتي
فاطمه :البنت غريبه وصارلها اكثر من شهر ونص محد سأل عنها حرام تعيشها بعذاب انا اقول تبلغ السفاره وترد لديرتها وتشوف اللي لها واللي عليها
فيصل: يافاطمه انتي ما تفهمين ! اقولك البنت مالها والي لاعم ولاخال
فاطمه: وانت منت بولي امرها لا تحمل المسئوليه منت باللي صدم اهلها ولاانت واحد من معارفهم ديرتها تكفل فيها
فيصل بأسى: اشوفك قاسيه يافاطمه وهذا مو من طبعك ؟؟؟؟
فاطمه:الله يسامحك ياخوي هذا وانا اويتنلك لاتقول كذا قلبي معها المسكينه بس انت وشتقدر عليه
فيصل يتنهد: يعني برايك اروح للسفاره بكره وانهي الموضوع
فاطمه: أي والله ياخوي هي بحاجه تروح وتغير تجو وترد ديرتها يمكن تحسن حالتها
اقتنع فيصل وقال بقلبه وهذا اللي بيحصل انشالله ومن الصبح استئذن من عمله وراح للسفاره وانهى الاجراءات معهم وسلمهم اوراق البنت اللي كانت بحوزته واللي من خلالها عرف كل شي عنها لا وصورهم الحبيب بعد .قاله موظف السفاره : احنا لازم نتصل الاول على اقربائها هناك ومدام حالتها مثل ماتقول تحسنت تقدر تسافر من اللحين بس لازم احد منا يروح لها ويشوف شنو تحتاج وشناقصها عقب يصير خير
طلع منهم فيصل وهو متضايق ماوده تروح لكن شيسوي هذا اللي لازم يصير مهما كان لازم ترجع لديرتها وناسها .كان معزم يروحلها المستشفى واخذ معه كولا وشكولاته وشيبس ومن هالشغلات الفنكيه "اللي تفرفش" طق الباب وماسمع الاجابه
"انا فيصل ممكن ادخل" هم محد رد عليه استغرب ..قرر يدخل ودخل ...كانت نايمه ..انصدم من زمان ماشافها كانت اخته هي اللي دايم تزورها ..عقله يقوله:استح على وجهك واطلع مو عشان البنت ماوراها والي تسوي اللي تبيه خاف ربك اللي هو وليها ..وقلبه يقول: اقعد بس ماعليك منه هو التعبان بالاخير احد يشوف القمر ذا فباله ويدور النجوم اقعد بس مهو كل يوم بيحصلك مزيونه مثلها وبينما القلب والعقل يتناجرون كانت العيون الشي الوحيد اللي استفاد تقلب نظرها بالملاك اللي نايم :مسكينه شلون تستحمل كل هالالم ماتستاهل
وقال بنفسه: اطلع اللحين احسنلي وبعد شوي اجيها حرام البنت نايمه مو حلوه افزعها ...وضع الاكياس على الطاوله ولما جا بيطلع شد انتباهه صوت ارتطام قوي على الارض: طررررررررررررراااااااااااااااااااااااااااااااخ

تكملة القصه...
. . . . . . . . . . . .
. . . . . . . . . . . .

الجزء الثالث:
مها:...........
سالم: تعالي
مها تكمل طريقها ولاكأن احد ناداها ...وعلي كان بجنب ابوه وقاله: يبه طقها يبه تعلي صوتها عليك وانت ساكتلها هذا بيتك ...طقها
اغتاظ سالم لما سمع كلام ولده وراح يركظ صوبها ...وهي لفت عليه لما سمعت كلام ولده اللي كان نسخه من ابوه ..........
ولما لفت عليه عطاها ذاك الكف اللي طيحها على الارض
سالم: يمكن هالكف يسنعج يابنت امج .....ماينفع معاج الا العين الحمرا......وخلي فلوسج لج يا....يالبخيله
ويطلع سالم من البيت مع ولده....
تبكي مها بصمت وحرقه وتنتحب تمسح دموعها وتمرر ايدها صوب حلقها اللي نزل منه قطرات دم ....
مها وهي تشيل عمرها: الله يسامحك ياخالي والله لو ولدك كان مكاني والله ان اهلي يعاملونه احسن من عيالهم ....طلعت لغرفتها وهي في قمة يأسها وحزنها وتقول بنفسها: اليوم يطقني وباجر الله اعلم شيسويلي؟؟
وفي غرفتها تتذكر ايام قبل اللي مافارقتها دقيقه......:
مها: عيدج مبارك يااحلى ام بالدنيا
الام: عساج من العايدين والفايزين تو الناس يمه جان نمتي بعد
مها: هههههههه يمه وين ابوي بعيد عليه ؟
الام: اكيد بالدوانيه واللحين يجي روحي ياقلبي لبسي اخوانج
مها: وانا هذا حالي كل عيد البسهم؟
الام: خلاص مشكوره مانبيج تلبسيهم اذا بتمننين؟
مها وهي تقلد المصريين: وانا أأدر يامَه؟ افا عليج اللحين البسهم واكشخهم ........ويدخل ابوها
مها وهي تسلم على ابوها وتحب راسه: عيدك مبارك يبه
الاب: هلا وغلا ببنتي والله عيدي مايتبارك غير بشوفتج
مها: الله يخليك لي يبه ولايحرمني منك...........ماقلتي جم بتعطيني عيديه؟
الام: ياابو ناصر ترى الكلام اللي ينقط عسل مو لله البنت تبيلها فليسات
الاب: حق والله ياام ناصر هذي مهاوي الغاليه تستاهل كنوز الدنيا.....بس وانا ابوج مايصير تقولين لاحد عطني عيديه لين يعطيج
مها: اولا انت مو أي احد انت ابوي –وثانيا: انا كنت اتدلع عليك ولابي غير سلامتك يالغالي
الاب: ههههههه ادري فيج اصيله ومن قال اني مااعطيج .....وهذي عشرة دنانير عيديه لج بس ها لاتعلمين اخوانج اني عطيتج عشره انا بعطيهم على دينار دينار وسامحيني يامها والله لو عندي ماابخل عليج بس انتي ادرى بالحال
مها تدمع عيونها: والله والله مابي غير سلامتك وتحب راس ابوها وتروح تقعد اخوانها وتلبسهم
"وينج ياايام قبل والله محد يقدر يسترجي يمد ايده علي" كانت مها على سريرها مجفسه رجولها ومقربتهم من صدرها وراسها على رجولها
::::::::::::::::::::
وبعد مرور اسبوع من اللي صار تزور بنت بيت خال مها:
ساره: اقولج انا ساره رفيجتها وسمعت انها عايشه هني ببيت خالها
ممكن تنادينها بسلم عليها صارلي زمن مو شايفتها
نوره مرة خال مها: لو سمحتي تكلمي بأدب داخله بيت الناس وتهاوشين
ساره: انتي اللي لو سمحتي صارلي ساعه موقفيني على الباب وبعدين دخلتوني بالغصب واللحين مستلميني تحقيق
وفي هاللحظات دخل ابو علي خال مها ويشوف ساره اللي كانت قمه في الجمال .... وسالم عينه كانت زايغه ويموت في شي اسمه الحريم وهذا الشي كان مضايق زوجته اللي كان يغيظها دايما لما يشوف مسابقات ملكات الجمال ...ونوره زوجته ماكانت على قدر من الجمال يعني عاديه واللي مصبر سالم عليها شيئين: العيال والشي الثاني انها من عائله غنيه ...زوجته كانت اكبر منه بسنتين وعيوبها واجد اما سالم فكان يقاله"مزيون" كان طويل وابيض وشواربه بنيه غامجه بدون لحيه ومن هالمواصفات الجماليه وفوق هذا كانت شهادته جامعيه بعكس زوجته اللي عادتها 100مره بثانيه ثنوي ....على فكره سالم كان بعده شباب وعمره 34سنه
ولما شافت نوره زوجها منبهر من اللي يشوفه سحبت ساره ودخلتها الصاله الثانيه وقالت للخادمه تنادي مها ...
نوره: شوفي هذي اخر مره تجين هني فاهمه ..
ساره: وليش انشالله؟
نوره: هذا مو بيت مها هذا بيتي انا..وانا كيفي من حقي ادخل اللي ابيه
سالم يدخل الصاله الثانيه: السلام عليكم
نوره ماتقدر تقول شي لانها ماتبي تبين للبنت انها تخاف على زوجها منها
ساره كانت بنت جريئه : وعليكم السلام والرحمه انت اكييييد خال مها
سالم وهو يقعد: أي نعم انا خالها اصلا اول ماسمعت بالخبر مارضيت على بنت اختي ورحتلها للسعوديه وهديت كل اشغالي عشانها تصدقين يا.....الا على فكره شسمج؟
ساره وهي تطالع نوره: اسمي ساره
سالم : عاشت الاسامي وانا سالم فرصه سعيده هههههههه تصدقين عاد رغم خلافاتنا الكبيره معاهم نسيت كل شي لما عرفت الخبر
"فيك الخير ياخالي ماقصرت "وتدخل مها وتسلم على ساره ....."ومن قبل كان بينهم اتصال"
طلعت نوره معصبه من الغرفه ولحقها سالم على طول وهو يقول بنفسه :هذي زعلها يودينا بدواهي عجوز النار نلحقها ونشوف اخرتها
مها: واخيرا ياساره مابغينا نشوفج
ساره: والله انشغلنا بالدنيا ...الا تعالي هذي مرة خالج والا جدتج
مها:ههههههه لا هذي مرة خالي
ساره: حرام مايستاهل
مها: ياساره هذا النصيب ...المهم كلميني على الجامعه شسوي ووين اروح اول يوم
ساره: تدرين انا بمرج كل يوم وبنروح مع بعض
مها: لاياحياتي مابي اتعبج بس جان اول يوم
ساره:الا كل يوم بعد انا صرت اسوق سياره
مها: صج مبرووووووووك
"يابنت الناس والله طلعت مني عفويه شفيج انتي صايره جبريت"
نوره: ترى انا سكتلك واجد وانت تماديت وهذي مو اول مره ياسالم
سالم: خلاص ياعمري والله مااقصد اني اضايقج
نوره تبكي: سالم حرام عليك انا زوجتك وحال حال أي مره بالعالم ودها ان زوجها يقولها كلام حلو ويشوفها بس هي .......ليش تحسسني بالنقص ؟
سالم: خلاص خلاص كافي يانوره ادري اني مقصر معاج بس مو للهدرجه
نوره:....................
سالم: نوره انتي زوجتي وحبيبتي وام عيالي لاتخلين أي شي يأثر فيج واللحين يالله قومي بدلي ثيابج
نوره: ليش ؟
سالم: عشان تحسين ان حالج حال الحريم
نوره:.........
سالم: شفيج صنمتي يالله قومي بوديج نتعشى بمطعم......عشا رومانسي
نوره: تكلم جد ياسالم تصدق صارلي سنين ماطلعت معاك
ويطلعون يتعشون بس سالم كان كل تفكيره بساره ويحس بالقرف لما يتذكرها ويشوف زوجته
::::::::::::::::::::::::::::

السعوديه:
فيصل: أي يمه خذيت اجازه
الام: واخيرا مابغيت
فيصل: والله بس عشانك يالغاليه
الام: الا قول اشتقت للبر والكشتات بس هالمره ابيك تكشتني مع قوم لافي بيت جيرانا
فيصل: ايه يحليله ابو غانم بيكشتون هالسنه ...خلاص انا بسأل العيال متى يطلعون
الام: لاتسألهم ولاتتعب عمرك يوم الاثنين الجاي بيطلعون
فيصل: خلاص بس بروحلهم اول
الام: مايحتاج انا قلتلهم اني بظهر معهم
فيصل: بس انا ماقلتلهم يمه ويالله انا طالع اللحين تجهزي يوم الاثنين امرك
الام: فيصل والخيمه ؟
فيصل: بمرك الاحد انزل الخيمه واخذ الاغراض واروح لمنزالهم واسوي الاغراض انا وفاطمه قبل تجين
الام: وفاطمه ظنك تروح؟
فيصل وهو طالع: مدري ابسألها
وعقب ماطلع من عند ابو غانم وسلم عليه وعلى عياله وقال انه بيخاويهم واتفق معهم ....رجع للبيت عند اخته وقالها عن البر وسوالفه وطلب منها تقنع زوجه ....على فكره فيصل وفاطمه تراضوا لان مالهم غير بعض وفهم فيصل وجهة نظر اخته وارتاح انها تبي مصلحته اما فاطمه فعرفت ان حبه لمها كان اكبر من أي شي بالدنيا......
فيصل بشقته بعد مااستحم وانسدح على السرير اخذ يقلب بالمسجات وتذكر مها ...صارله عشر ايام ماارسلها شي وقرر انه يرسلها هالمسج:
"ان جيت ابقرب ردني قول مابيك....وان رحت اببعد قلت يمكن تبيني...تعبت اضمك داخل القلب واخفيك....واخاف من عينن تشوفك بعيني ...شفها يديني لا قربت من اياديك ....وشف حكمة الله ماتطولك يديني"
اول ماقرت مها المسج حست فيه هذي اول مره يرسلها شعر ....."يعني معقوله يحبني؟" وطرشتله هالمسج: " طال البعاد ولوع القلب فرقاك ....ومن غيبتك صاب المولع مضره ...اسهر طوال الليل واعيد ذكراك ....واراجع الماضي وبالقلب حره.....يذكر زمان فات بالخير وياك....الله يعيده لو بالايام مره ...."
فيصل:"ياغايتي ماعاد فيني اخبي ...حبـــــــــــــــك تعدى حدود نفس كتومه.....مابيك تسأل عن مقادير حبي....بكره مع الايام تطلع علومه"
مها:"اغيب....واخذ لي مع الوقت وقفات.....ورغم البعاد...."حبكم مانكرته"
فيصل: "مها ممكن اتصل عليك"
مها: لا بصراحه رصيدي مايكفي مكالمه دوليه
فيصل: طيب ممكن اعترفلك بشي...
مها: فيصل قلبي يعورني لايكون فيك شي؟
فيصل: اسم الله على قلبك ...وليه يعورك؟ انا اهمك؟
مها: انت اكيد تتهرب شبغيت تعترف فيه؟
فيصل: مها والله والله والله العظيم احــــــــبــــــــك وحياتي ماتسوى بلياك
انتظر فيصل الرد من مها بس ماردت ...خاف :ياربي انا وشسويت لايكون ازعجتها والا ضايقتها ...رد وارسلها مسج "مها انا اسف اذا تماديت بكلامي وتعديت حدودي وصدقيني اذا ماتبغيني قول ابتعد واوعدك ماتشوفين رقمي مره ثانيه" .....هم ماردت مها ...مسك قلبه وتم يفكر فيها
مها من صوب ثاني كانت متفاجئه ماتدري هي سعيده او خايفه ...هي بداخلها ميول لفيصل بس مو حب يمكن شكر وامتنان كان ودها ترد عليه ولو رساله وحده بس رصيدها مافيه الا19فلس ....آه يالقهر
::::::::::::::::::::::::::::::::::::
وبعد 4 ايام فيصل يمر امه علشان يروحون يخيمون بالبر:
فيصل: يالله يمه ساعه انطرك بالسياره انا
الام: لحظه يافصيل اباخذ الكباريت اللي فالمطبخ
فيصل: يمــــــــــــه خليهم نمر الدكان وناخذ اللي نبغاه
الام: لا الا باخذهم انا مدري وين حاطتهم......ياحبك للخساير
فيصل: يمه حرام عليكي متى بتتركين عنادك فاطمه صارلها ساعه بالخيام بروحها ماتت من البرد واحنا الدوه معانا
الام: وفاطمه وراها ماتاخذ دوتها؟
فيصل طفر من امه: مدري عنها وانا انتظرك بالسياره 5دقايق ترى اذا ماجيتي بمشي
الام: رووووووووح زين تنتظر غصبن عليك
فيصل: نشوف ياام فيصل يال....يالعوبه......) ويطلع فيصل بسرعه قبل تحذفه امه بالقلاس اللي عندها
وراح يتفقد الاغراض ....طوطوط طوطوط."صوت المسج"..: منو هالفارغ اللي يرسل مسج من صباح الله خير....اول ماشاف الرقم اعتفس حاله وسارت بدمه رعشه مايحسها الا لما يجي طاريها: " صباح الخير ...فيصل انا اسفه اني تأخرت عليك والله رصيدي ماكان يكفي انا حبيت اعتذرلك "
فيصل : والله ماراح ارسلها خلها تتوب علشان تعرف تخوفني عليها ...وهو يفكر ويقرى رسالتها عشر مرات الا امه دخلت السياره
الام: فصول يامال العافيه صارلي ساعه قاعده بالسياره وانت تقلب بالجوال
فيصل: هلا وغلا بالغاليه ها خلصتي
الام: أيه خلصت يالله ....ياهوين فاطمه تصدق 9 مكالمات لم يرد عليها
فيصل: ههههههههههههههههه يمه انتي تعرفين للجوال
الام: اجل ها؟ بس انتم الي تعرفون لا وازيدك من الشعر بيت اعرف ارسل رسايل
فيصل وهو يحرك السياره: والله ؟ يالله اللحين ابيك ترسليلي مسج
الام: مسج مااعرف اعرف رساله
فيصل:هههههههه الاثنين واحد يمه
الام: يالله استعد
وانتظر5دقايق لين وصله المسج :يمه مسرع وشو انتي ياباني
الام: بسم الله الرحمن الرحيم انا ماكتبت شي للحين اصبر علي
المسج كان من مها تقول فيه: (ان غاب مرسولي...ترى القلب ماغاب....يبقى معك....لو الظروف ابعدتني)
وبنفس الوقت وصلت رسالة امه" فصيل انتبه للدرب" ....حس فيصل بشي غريب شاف امه وهي تقفل جهازها وتذكر مها : ماني راد عليها وشغل شريط محمد عبده "بنت النور" .........يمه اهديها ليكي .....ويقول بقلبه: ولك يااحلى مها
الكويت الساعه 8بالليل:
مها: ياربي شفيه لايكون زعل ...ليش يزعل انا اعتذرتله واظن عذري مقنع شسويله بعد؟
يقطع حبل افكارها اتصال ساره:
ساره: قوه مها
مها ببرود: هلا ساره
ساره: شلونج؟
مها بنفس البرود: بخير
ساره: مها شفيج عسى ماشر؟
مها: مافيني شي
ساره: شهالاجابات المختصره
مها:عادي
ساره: شنو عادي انتي تعبانه؟
مها:لا
ساره: مها تكلمي.. ترى محد فاهمج كثري علميني شصاير
مها: ............
ساره: مها ليش ساكته
مها: السالفه طويله وانشالله اقولج بالجامعه واللحين ابي منج شي
ساره: انتي تامرين مو تطلبين
مها: تسلمين ياقلبي بس بغيت منج مسج عتاب
ساره: غريبه وشتبين بالعتاب انتي؟... ومنو بترسليله بالاساس؟... مو تقولين كل رفيجاتج قطعتي علاقتج فيهم؟
مها: ساره ليش تطولينها وهي قصيره قلتلج بالجامعه بقولج كل شي اللحين بتعطيني اللي قلتلج ولا لا؟
ساره: اكيد بعطيج من عندي اغلا منج .....مها لحظه شوي ...هلا يمه ....اوكيه اللحين جايه....اقول مها امي تبيني اتعشى معاها يالله اللحين اطرشلج المسج مع السلامه....
مها: مع السلامه......ساره ....سلميلي على امج
ساره: يوصل انشالله يالله تبين شي؟
مها: سلامتج
سكرت مها من عند ساره وتمت تفكر بأمها شوي عقب وصلها مسج ساره : " ماترحم اللي مات قبل انتحاره...اجرم بنفسه وانت في قلبه اجرمت ...اثر التجاره والمحبه شطاره....وانا من انصار الهوى ماتعلمت ....يفزلك جسم براه انتظاره ....ويقوم لك قلبي وانا بعد ماقمت"
مافكرت مها سيدا ارسلتها لفيصل......بس بعدها بدقيقه ندمت على اللي سوته ليش انا ذليت نفسي جذي اللحين شستفيد يمكن الرجال عنده ظروف يمكن فيه شي والله اني غثيثه"
فيصل كان عند النار لما وصله المسج كان يسوي قهوه ويقلب الحطب يمين وشمال واول ماقرى المسج قلبه عوره وهو يقول بنفسه : ليه انا قاسي للهدرجه واضح البنت تحبني وانا احبها ليه مااعيش حياتي؟ وارسلها على طول: "وتلومني فيك يوم اغليك يااغلى من جروحي ومشقيها....ابيع كل البشر واشتريك حاضر سنيني وماضيها.....ياغايب صرت افكر فيك بأول همومي وتاليها....اطلب حياتي وانا بعطيك تستاهل الروح ومهديها" ووراها ارسل رساله ثانيه : مها تسمحيلي اقولك حبيبتي! ترى انا مو قصدي اتهرب منك بس انا ابيك تأكدين من شعورك تجاهي وتحددين موقفك"
مها:" اولا:بدري على كلمة حبيبتي وثانيا: شعوري تجاهك لايمكن يتغير ....اخ عزيز لايمكن انسى فضله
انصدم فيصل لما قرى رسالتها :ياقساوتها اقولها احبك تقولي اخ عزيز ...وبدري على كلمة احبك ...ليه يامها ليه توهميني والاشعار اللي كنتي ترسلينهم لي؟ ليه تقتلين الامل وليه يتحول الحلم الجميل اللي كنت اعيشه الى كابوس ؟ ليه ياربي يصير فيني كذا؟؟؟؟؟؟ وقام فيصل وطلع من بيت الشعر اللي كان مليان رجال ...اغلق جواله وراح يم خيمته اللي فيها امه واخته بس ماكان موجود احد غير بنت فاطمه كانت نايمه والخادمه عندها ....
فيصل يمزح مع الخادمه مع ان همه كان كبير: كوماري روحي سوي قرقر مع سيلاني ثاني انا يبي يقعد مع اموره شوي ......

كوماري: كلاص انا يبي يروح بابا بس انت شوف اميره كويس
فيصل: زين جب وقومي انقلعي مابقى الا انتي تامريني
تم فيصل يتأمل اميره وهي نايمه ويتذكر مها وكلامها له ....اخ عزيز.....عزي لحالي وقلبي اللي تولع فيها وتقول اخ عزيز ....هي وين وانا وين
بس فيصل لازال يحب مها ولايمكن ينساها وقعد يحطلها الاعذار ...........

الجزء الرابع
الكويت:
اول ايام الجامعه:
في سياره ساره:
مها: صباح الخير!...................وتسلم على ساره
ساره:صباح النور ياهلا اقول مها جان قعدتي بعد
مها:لاوالله تأخرت عليج
ساره:لاماتأخرتي عادي
مها:سامحيني ياقلبي انتي عارفه بالظروف
ساره وهي تعدل الجامه:وانتي للحينج بالطابق الثالث
مها بحزن:أي
ساره: اسفه مها والله ترى موقصدي اتطنز عليج...
مها:لاعادي بس انتي ديري بالج على الدرب
مها كانت متضايقه وحاسه انها قست على فيصل اللي من هذاك اليوم مااتصل ولاحتى ارسل مسج ....
ساره: مها شفيج صارلي ساعه اكلمج؟
مها: هلا ساره بغيتي شي
ساره: والله ان فيج شي جايد بتقولين والاشلون؟
مها: ساره.....انا قلتلج بعدين اقولج كل شي
ساره: مها اعتبريني اختج واذا محتاجه شي قوليلي لايردج الا لسانج
مها: تسلمين ...ماتقصرين ياساره ادري فيج اخت وعزيزه بعد....بس انا مو محتاجه شي صدقيني
وصلوا الجامعه وساره ماقصرت مع مها علمتها كل شي هي بحاجته الاثنين كانو بنفس الكليه
ولما رجعت مها من الكليه كان خالها عند الباب وشاف ساره .....وهو فقلبه يقول" ياربي الله بلاني بغزال عذب قلبي... ومها هذي من وين عرفتها ...من بنته البنيه هذي " نزلت مها من السياره...
مها: السلام عليكم
سالم: وعليكم السلام ........اقول مها تعالي ابيج بالصاله
مها: خير خالي.... في شي جديد بعد غير سالفة الفلوس
سالم: مها متى بتعقلين ؟ عيب عليج انا خالج كلميني عدل ......وبعدين سالفة الفلوس انتهت ابيج بسالفه ثانيه
مها: خلاص ابدل ثيابي و اجيك
سالم بعصبيه: لا ...لاتبدلين ثيابك ولاشي انا ابيج اللحين قبل ترجع نوره من الشغل
وفي الصاله:
سالم: مع منو راده؟
مها: هههههههههه من صجك سالفه وسالفه وبالاخير مع منو راده؟
سالم:ممكن تردين على قد السؤال ولاتطولينها؟
مها: انت تدري مع منو انا راده وانا بعد قلتلك امس اني برد مع ساره رفيجتي
سالم: ومن بنته هذي ؟
مها: ليش بتخطبها؟؟؟؟؟؟
سالم بعصبيه: مهااااااا من حقي اعرف بنت اختي منو ترافج صح والا انا غلطان
مها: ساره بنت خالد بن روضان
سالم: وبيتهم أي منطقه؟
مها: بنفس منطقتنا القديمه
سالم: خلاص اللحين روحي بدلي ثيابج ونزلي تغدي
مها: لا انا مابي غدا تغديت بالجامعه
سالم : كيفج ....روحي ارتاحي شوي
مها بقلبها" من وين جايب كل هالحنيه والله ان وراك شي".............
سالم: اقول مها ...ماقلتيلي ....بتروحين معاها كل يوم
مها: أي ....وترى انا ماقلتلها هي اللي اصرت
الظاهر ان سالم حط ساره في باله لانه من اول يوم شافها فيه وهي صورتها في باله
بدلت مها ثيابها وفكرت بخالها ....شنو ناوي عليه؟؟؟؟؟؟؟؟؟
::::::::::::::::::::::::::::::::::::
السعوديه:
فيصل: عامر انا قررت قرار اخير مافيه غيره
عامر: شقررت بعد اللي يشوفك يقول رامسفيلد ماعندك ماعند جدتي
فيصل: قررت اسافر....... الكويت .
عامر: ايه وتدور على سندريلا
فيصل بجديه: لو سمحت بلاطنازه
عامر: يافيصل انت تغيرت منت بالاولاني هالبنت هذي لعبت بعقلك خلتك شخص ثاني حتى الضحكه حارمها على نفسك حرام اللي تسويه في نفسك خاف الله حتى الاكل ماتاكله كل هذا عشان بنت؟..... ماخبرتك ضعيف للهدرجه
فيصل: عامر انت ما جربت اللي انا جربته ...حب وفراق وهجر واشواق وجراااح كافي والله مااتحمل
عامر: ومتى ناوي تسافر الكويت
فيصل: لما اتأكد من شغله...
عامر: فيصل نصيحه من اخوك اللي ماجابته امك لاتعمل اي حاجه تندم عليها بعدين وانت منت بقدها
فيصل: لاتخاف اخوك ذيب
عامر: الله يستر منك يالذيب قم بس عشنا تراني ميت جووووووووووع
.......................................
قرر فيصل يرسل لمها مسج عادي واذا ردت عليه يفاتحها بالموضوع.....
فيصل: "شفيك لامني بغيتك تهربت ....هديت حيلي بالمشي في دروبك ....لاشرقت رجلي عن الدرب غربت ...وان اشملت رحت ومشيت لجنوبك ...لاجيت المك من ايديني تسربت......وان بان مشراقك صدمني غروبك..."
بعد نص ساعه :
مها: "لاتحسب اني اذا ابطيت ناسيك....ماينسى عشرة صاحبه غير الانذال.....حدتني ظروفي على البعد لاجيك....هم بوسط القلب والدمع همال....والا انت ياكل الغلا افتخر فيك.....وحبك سكن داخل فؤادي ولازال"
وارسلت رساله ثانيه...."فيصل انت وينك ليش هالغيبه الطويله..... اذا زعلك كلامي ...انا اسفه واي شي اطلبه مني يرضيك"
فيصل:"اناديك...ويبقى للحكي في داخلي ميعاد....ولادري ليه لاضقت بزماني قمت اناديك؟..."احبك"..ليه اكررها؟ وليه بداخلي تنعاد؟...ولو اصرخ في هــــــــــــــــــواك... مليون "احبك" ماتوفيك.........."
وارسل بعد: " ازعل؟ ...ايه انا زعلان عليكي لانك تجردتي من مشاعرك وحتى اتصال مااتصلتي علي يعني مايهمك اناحي والاميت"
مها:" لاتقول جذي والله انك تهمني بس انا انشغلت شوي مع الجامعه تدري هذا اول اسبوع لي "
فيصل: " مبروك"
مها: " الله يبارك فيك...وليش تكلمني باختصار؟"
فيصل: " الظاهر انك ماتدرين ليه انا زعلان عليكي وتراني للحين زعلان وابيك تراضيني"
مها:" يمكن زعلان لاني ماسألت عنك من زمان ....وانا عند كلمتي اطلب أي شي واراضيك "
فيصل ارسلها رسالتها اللي تقول فيها " اخ عزيز"وكتب معاها "هذا اللي مزعلني"
مها تقول في نفسها" الاخ حساس" : وهذا الشي اللي مزعلك؟ فيصل ترى انا قلت هالكلام بدون تفكير صدقني ..والله يا....حبيبي ماااقصد" .....(زادت الجرعه)
فيصل يسوي روحه ثقيل:"بدري على كلمة حبيبي"تذكرينها" ...انا ماراح اقولك مثل ماقلتي وترى كلمتك هذي انتظرها من زمان ...مها ارجوك كافي والله مليت فراقك ..ذبحني"
مها:" اذا انا جرحتك بشي اتمنى انك تنساه وتسامحني على كل مابدر مني ....والفراق شي مو بيدي هذا امر من الله"
فيصل: " تصدقيني اذا قلتلك اني احبك؟ وابغى اعرف ردك و هالمره ابنسى اني اخ عزيز وابغى منك كلام ثاني ومابغى غير الصراحه"
تأخرت مها بالرد شوي لانها تمت تفكر بكلامه ....هي بعد تحبه يمكن اكثر من حبه لها بس خلت الشي هذا بقلبها على امل ان الايام تمحيه..
مها:" انا بقولك الصراحه بس ترى اول ماارسل الرساله لك بسكر جهازي وماراح اشوف ردك الى بكره الصبح...الصراحه اني مااحبك ....مااحبك وبس الا اموووووووووت فيك"
تأكد فيصل من اللي بغى يعرفه وهو بعد حس انها تحبه علشان جذي ماتفاجىء ................"حلو الحب"
وبعد هالاعتراف من الطرفين صارت العلاقه بينهم اقوى بس كانت مواضيعهم محترمه:::::::::::>لايروح بالكم بعيد<
::::::::::::::::::::::::::::::::::
ساره:يااخت مها صارلنا شهر من داومنا ومااشوفج قلتيلي على طول سرحانه وبدنيا ثانيه انتي شفيج؟
مها: اقولج عن شنو ؟؟؟؟؟
ساره: والله مادري اسألي نفسج؟؟؟ا
مها:..........
ساره:للحول ...ردينا على السرحان ...يابنت الناس سالفتج اللي قبل قلتيلي بقولج عنها
مها: أييييي تذكرت والله هي سالفه وحده وشاغله بالي
ساره :الا قولي واحد وشاغل بالج
مها:اذا بتمين تكلمين بهالاسلوب انسي اقولج شي
ساره: اسفين يالغالين.....يالله عاد قولي والله شكلي بموت اذا ماقلتيلي
وقالتلها مها السالفه كلها من طقطق لين السلام عليكم.....
ساره: الله الله على الحب والله انج مو هينه حتى انتي تحبين
مها: وليش مااحب طايحه من عينج انا وبعدين من قالج اني احبه ؟
ساره: خلي سوالف العبط هذي وجذبي على غيري ....شنو اخر التطورات..
مها: عادي ....بس مسجات شعر
ساره: يعني ماكلمتيه ولا مره؟
مها: بس مره بعيد الفطر اللي طاف
ساره بسخريه: ومتى ناويه تكلمينه مره ثانيه بعيد الضحيه الجاي
مها: موجنج تمصخرين؟
ساره: تبيني احلف انه يحبج؟ وانج تحبينه؟
مها والظاهر ان الموضوع شدها: أي تكفين حلفي...
ساره: ليش يامها ناقصج الدليل؟ وليش مو واثقه ان الرجال يحبج واكثر من اهله؟ ....والدليل انه رفض بنت خالته مثل ماقالج
مها: بس ياساره انا خايفه ان كل اللي يقوله لي جذب وانه يلعب علي والله انا خايفه ومتردده..
ساره وهي تقلد مها: يجذب ويلعب علي....انتي خبله الرجال دافعلج اللي وراه واللي دونه ومتسلف اكثر من 10الاف بالكويتي تقولين يلعب معاج
سكتت مها وتذكرت ايام المستشفى والعذاب اللي تحملته والضغط النفسي والجسمي اللي كان عليها .....نزلت دموعها وبجت بصمت
ساره: مها انتي تبجين؟
مها:.....................
ساره وهي تتجه صوب مها: مها ياقلبي والله ماكنت اقصد اضايقج بشي سامحيني
مها ارتفع صوتها وهي تبجي: والله محتاجتهم ياساره والله اني بدونهم مااسوى ليش ياربي ليش مااخذتني معاهم؟؟؟؟
ساره: تعوذي من ابليس يامها ولاتقولين جذي ترى هذا اعتراض على امر الله حرام عليج استغفري ربج وادعيلهم بالرحمه
مها وهي تمسح دموعها: انا ضايعه ياساره والله ضايعه ولااحد مهتم فيني ولايدري عني احد لو اموت بغرفتي محد يسأل عني ...ترى انا اكابر بس اعترفلج اني ضعيفه ..ضعيفه حيل ..انا مثل الي عايم بالبحر والامواج تضربه يمين وشمال...مدري شنو اللي لي واللي علي وليمتى بتم جذي؟
ساره ماعرفت شتقول لمها لان فعلا معاها حق : مها حبيبتي ...ترى مايهون علي اشوفج تعذبين جذي وانا مابيدي شي ياحياتي انا مستعده اكون لج الاخت والام والابو بعد احنا كم مها عندنا؟ خلاص اللي صار صار وهذا امر الله
مها: ................
ساره: اقولج شي يونس ؟
مها: مااظن في شي يونس اللحين
ساره: المحاضره:.....ترى طافت علينا ....ردينا ايام قبل ايام النحشات.....تذكرينها
مها وهي تبتسم :ايام... لاونشجع البنات على النحشات بعد....
ساره: أي جذي ابتسمي وخلي الهموم وراج
"ياضايق الصدر بالله وسع الخاطر...دنياك يازين ماتستاهل الضيقه.....حسايف الحزن يغشى وجهك الطاهر...والود في وجنتك حرام تغريقه...يفداك قلب على ماتشتهي حاضر....يفداك باللي بقى لي من معاليقه ...مافات خله ولاتهتم من باكر ...."
ساره:"وهذا مسج مني اذا يرضيج" ....كانت علاقة مها مع ساره قبل الحادث قويه وحتى بعد الحادث
مها تبتسم وتطالع ساره: مشكوره ياساره على وقفتج معاي
ساره: يامها انا ماسويت شي يستحق الشكر وترى غيري مستعد يضحي بحياته عشانج
مها: فاهمتج ياساره ...بس شنو المطلوب مني ؟
ساره: المطلوب منج تنادين الفلبينيه اللي وراج لاني بتغدى جعت
مها: هههههههههه

في السعوديه عامر وفيصل يستعدون للسفر للكويت
:::::::::::::::::::::::::::::::::::::::::::::::::: ::::::::::::::
فيصل وهو في السياره: يالله ياعامر ترانا تأخرنا ...
عامر: ياابن الحلال اصبر لاحق عليها ..ترى ورانا اهل نسلم عليهم
فيصل وهو يحرك السياره: كل هذا سلام ...خلصنا يااخي.....عندك شي والا حرك
عامر: حرك يااخي ذبحتنا ...ورانا طريق طويل ...وترى من اللحين اقولك ماراح اتعب نفسي بشي انت اللي تحمل كل شي لاتنسى اني مخلي اشغالي و....
يقاطعه فيصل : بس بس تراك ذبحتنا خلاص انا اللي اتحمل ماعليك من شي بس اكرمنا بسكوتك
عامر: اقول فيصل امك كيف رضت تخليك تسافر العاده ماتخليك الا بطلعة الروح؟
فيصل: ومن قالك انها تدري اني مسافر؟
عامر: كيف يعني؟ موحرام عليك تروح دون شور امك!
فيصل: انا قلتلها اني مسافر لأبها ماقلتلها اني مسافر برى المملكه
عامر: فيصل انت مقتنع باللي تسويه ؟ وتعتقد امك لودرت وشراح يصير؟
فيصل:ياعامر وانا اخوك.... امي على عيني وعلى راسي واللي انا اسويه ماظنتي يغضبها لان انا لي الحق اختار الانسانه اللي اعيش معها طول عمري
عامر: طيب انت واثق ان البنت ترضى تزوجك؟
فيصل: ليه وانا وشفيني عشان ترفضني؟ ماناقصني شي والحمدلله
عامر: طيب انت سألتها؟ عرفت هي تبغاك والا لا؟
فيصل: لا بس انا عندي احساس انها ماترفضني
عامر: اختك تعرف باللي ناوي تسويه؟
فيصل: محد يعرف غير الله ثم انت.... واختي مثل امي على بالها اني رايح ابها
عامر:اول مره يافيصل احس ان اللي تسويه غلط ...
فيصل: اصبر وشوف وبتعرف بالاخير ان اللي اسويه صحيح لانها حياتي وانا اللي برتاح بالاخير
:::::::::::::::::::::::::::::::::::::::::::
ام فيصل: فاطمه انا احس ان اخوكي ماهو على بعضه ...علميني فيه شي
فاطمه: يمه ترى فيصل تغير حيل خصوصاعقب السالفه اللي صارت السنه اللي طافت
ام فيصل: وانتي للحين تذكرينها ...انا ادري اني غلطت واعترفت بخطاي
فاطمه: فيصل رجال يمه وصعب ينسى بسهوله ....انتي جرحتيه واهنتي مشاعره
ام فيصل: اشوفك كبرتي اللي سويته مع انه مايستاهل
فاطمه: يمه انتي ظربتيه قدام اللي يسوى واللي مايسوى وهو رجال كبير عمره22 سنه
ام فيصل: الظاهر انك نسيتي وش كان مسوي ؟
فاطمه: مانسيت بس مهما كان كبر غلطته المفروض انك ماتضربينه
ام فيصل: لاتنسين انه طلع المستأجرين من بيتي ...وبعدين انا ماظربته حيل
فاطمه: اولا المستأجرين يمه ماكانو زينين وسمعتهم خايسه وفوق هذا عزابيه ...وبعدين انتي ظربتيه قدام واحد منهم وهذي تعتبر اهانه يمه
ام فيصل: اللي صار صار وانتي مثل ماتدرين اني ندمت على اللي سويته وطلعت المستأجرين من البيت
وتأسفت منه وهو رضى عني اعرفه فيصل مايزعل على امه
فاطمه: بالرغم من انه ولدك الوحيد الا انه ماكان يحس انك تهتمين فيه ...اهملتيه يمه ولو أي احد مكانه كان انحرف بس فيصل كان غير عن كل الشباب
ام فيصل: وانا وش اهملته فيه كل اللي كان يحتاجه كنت اعطيه ؟
فاطمه: على قولتك اللي صار صار وماله داعي ننبش بالماضي ....
ابو فيصل كان رجال طيب وصالح لكن الله بلاه بحرمه نسره ...كانت دوم تعارضه وتكسر كلمته وهو متحملها عشان عياله..... وكان رجال تعبان معه ضغط وسكر ...ومات بسبب ارتفاع الضغط لما كان يتهاوش مع ام فيصل وهي بدورها كانت تحر قلبه اللي كان على قده ...ام فيصل تزوجته وهي صغيره عمرها 15 سنه وهو كان كبير وضعف عمرها وهذا السبب اللي كرها فيه مع انه "ابو فيصل " كان يحبها بس للاسف ماكان حبه بمحله .....فيصل وفاطمه كانوا متأكدين بداخلهم ان امهم هي السبب في موتت ابوهم بس مابينوا لبعض
من صوب ثاني كان سالم خال مها في كل يوم يزيد اعجابه بساره صديقة مها وفي كل يوم كان يكره زوجته اكثر وييلعن الساعه اللي تزوجها فيها ....وقرر انه ....يتعرف عليها ......
سالم: روبيكا....روحي نادي مها بسرعه خلي يجي
روبيكا: بابا انا مايروه فوق انا في خاف شوف ساعه كم
سالم: لعنبو دارج انتي تخوفين ديره بكاملها ......يالله روحي ناديها لاكف على وجهج الاسود اللحين
روبيكا: زييييييين لايسوي جنجان واجد...
وتروح روبيكا تنادي مها اللي كانت تكمل البحث :
روبيكا: مها ....هذا بابا سالم يبي انتي
مها : اوووووووف هذا وقته ....شنو يبي ؟
روبيكا: انا ماكو يعرف...روهي انتي شوف ..هذا سوي جنجان حق انا
مها: والله ياروبيكا محد مظلوم بهالبيت غيري انا وياج
روبيكا: لايسوي كلام واجد انا مايعرف انتي شنو قول
مها: زين يالله امشي خلينا نشوف
شيبي معزبج هذا
وتنزل مها للصاله:
مها: هلا خالي ...بغيت شي ؟
وقبل يرد خالها ...رن تلفونها النقال:
مها: هلا ساره ....اي أي اوراقج عندي ...خلاص اوكيه انا اجيبهم بكره انشالله....اوكــــــــيه...مع السلامه
سالم انتفض قلبه لما سمع اسمها....
سالم: اقول مها ...ممكن نقالج دقيقه...
مها بتردد: ليش؟
سالم: شنو ليش؟ حرام اشوفه
مها بخوف: ها ؟ لالا مو حرام ....بس فيه خصوصيات
سالم وبدى الشك يتسرب لقلبه: وانتي شعندج من خصوصيات ها! اقولج عطيني
مها تركض لغرفتها ويلحقها سالم ....ومسك ايدها ولفها ورى ظهرها واخذ التلفون من ايدها الثانيه وهو يقول: انتي شعندج ليش رحتي تركظين؟ شفيج؟
سكتت مها وتمت تطالع تعابير وجهه وهو يقلب بالتلفون .....انصدمت لما شافته يطلع جهازه وينقل رقم .....

الجزء الخامس:
سالم: انتي بنت معقده ...اخذي تلفونج وطسي غرفتج وان شفت رقعة وجهج مسحته بالارض .....الحمدلله والشكر
مها خذت التلفون منه وايدينها ترتجف ورجولها مو قادره تشيلها ....قعدت على الارض ومسكت التلفون وشافته كل شي مثل ماكان
هي خافت ان خالها يقرى مسجات فيصل اللي كانت مخزنه اسمه بحرف "f" .....بس خالها ماكان ماخذ باله من الاسماء غير اسم واحد هو ساره ...... راحت مها غرفتها وهي للحين خايفه وقلبها يدق بسرعه ...ماكانت متأكده من ان خالها اخذ رقم فيصل او لا ....
سالم من صوب ثاني ماكانت الارض شايلته من الفرحه وعلى طول خزن الرقم بتلفونه بإسم"فرق كبير" وكان يقصد فيه الفرق بينها وبين زوجته ....

::::::::::::::::::::::::::::::
فيصل: عامر انت نمت ؟
عامر: ................
فيصل: عامر؟
عامر: ............
فيصل: فرصه ماتتطوف خلني اتصل على حبيبة قلبي واقولها اني بدربي لها
ويتصل فيصل على مها اللي انصدمت اكثر لما شافت رقمه .....وكلمت
مها بصوت خائف: الووو
فيصل: هلا وغلا براعية هالصوت
مها بارتباك: هلاهلا فيصل
فيصل: عندك احد ؟
مها: لا ماعندي احد
فيصل: اجل وشفيكي خايفه ؟ رصيدك يكفي ندردش مع بعض شويه
مها حست بإرتياح: أي يكفي ....شخبارك فيصل؟
فيصل: وشخبار واحد سمع صوتك .....اكيد انه بخير وشاف العافيه
مها : مو للهدرجه
فيصل: للهدرجه واكثر ...ياحبيبتي انتي ماتدرين انتي بالنسبه لي ايش
مها بدلع : أيـــــــــــــــــــــــش؟
فيصل: ههههههه اعتبر الباب مفتوح لي واعبر على كيفي؟
مها: ..............
فيصل: السكوت علامة الرضا
مها: ليش ماتخليني انا اللي اعبر ؟ كل انت اللي تعبر وانا ساكته
فيصل: يعني فيه مشاعر بقلبك لي؟
مها: وانت توك تدري؟
فيصل: ههههههه ادري من زمان بس ابي اسمعها منك
مها: مدري والله بس احس اني من عرفتك ماودي اخسرك .....صح ان الظرف اللي تعرفنا فيه على بعضنا كان مو مناسب ...بس يمكن كان خير لي ولك ....صدقني يافيصل اناعمري ماكلمت أي واحد غيرك ولا اعرف شلون اعبر عن شعوري تجاهك ...
فيصل: قولي كلمه وحده
مها تستهبل: كلمه وحده
فيصل: هههههههههه ...اقول مها ياحلو الاستهبال,....يالله قولي انا استناكي
مها: أي شقول والله مدري
فيصل: قولي الكلمه اللي عذبتني وعذبت ملايين غيري
مها: مو وقته
فيصل: الا وقته ونص
مها تضيع السالفه: فيصل انت وينك اللحين؟
فيصل: انا جايك بالدرب ياحياتي
مها: هههههه أي صح وانا انطرك
فيصل: ترى انا ما ا ت غ ش م ر معاكي..... تذكرين هالكلمه "اتمغشر" اللحين صرت اضبطها
مها تضحك
فيصل: يازيـــــــــــــــــــــــــن الضحكه ويازين راعيتها عساها دوم انشالله
مها: فيصل ابي انام نعسانه ووراي دوام
فيصل: نغزه قويه يعني تبيني اسكر
مها : أي
فيصل: مابي
مها: انا بسكر وانت كيفك ....
فيصل: مها ماودي اسكر
مها: ولا انا بس .......
فيصل: لا تقولين ماعندك رصيد
مها: قلتلك عندي والله
فيصل: خليني اجي الكويت والله لعوضك عن كل شي
مها: انــــــت ويــــــنك
فيصل: انا بقلبك .....والا انا غلطان
مها: لا والله منت بغلطان ....
فيصل : مها بتنامين
مها: انت كيفك
فيصل: اسف لازعاجك .........ممكن اغنيلك
مها: والله اذا صوتك حلو فلا تبخل علينا
فيصل: بما انك اول واخر مره تحبي ....فأهديلك هالاغنيه
فيصل كان صوته حلو وغنالها اغنية :
حــــــــــايره والشـــــوق بين عيونـــــــج........خــــــــــــــايفه تحبـــــين ويـــــــــــــلومونج
ضـــــــــــالــــه بنص الدرب محــــتـــــاره.......مـــــاتــــــعرفين هذا العـــــــشق واســــراره
والــــــســـــهر ذبــــــــل ســـــواد عيــــــونج
فيصل: وســـــــــلامـــــتك
مها: كمل .....
فيصل: كافي ياحياتي الحين نامي والجايات اكثر من الرايحات
مها: يالله تصبح على خير ...
فيصل: مها تغطي عدل ترى الجو بارد
مها : انـــــــــشالله على امرك تبي شي بعد ؟
فيصل: ماابغى غير سلامتك
مها: مع السلامه
فيصل: مع السلامه
ويسكر فيصل التلفون وهو يكمل اغنيته
عامر وهو يلتفت على صوب فيصل : " ياعيني على الرومانسيه يااخي "
فيصل منصدم : هي انت من متى قاعد
عامر : من " هلا وغلا براعية هالصوت"
فيصل منحرج: وليه ماقلتلي انك قاعد ؟
عامر: اقول وقف وانزل ...شبعت نوم ودي اسوق .......ارتاح انت
ومن صوب ثاني " مهـــــــا" كانت حاسه بشي غريب " ياربي شنو نهاية هالحب لايكون هو يتسلى معاي؟ لالا فيصل مايتسلى مشاعره حقيقيه تجاهي ....واضح انه يحبني ...وانا ليش ماانام احسنلي ؟ "
::::::::::::::::::::::::::::::::::::::::::::::::::
وصل فيصل الكويت بالفجر وارتاحوا بفندق يومين ......
عامر: فيصل صارلنا يومين وانت ماسويت شي ؟
فيصل: اليوم انشالله بروح للعنوان اللي عطتني واخطبها رسمي من وليها اللي هو خالها
عامر: طيب وليه مارحتله اليومين اللي فاتوا
فيصل: حبيت اريح شوي
عامر: وخويتك.....ماكلمتها
عصب فيصل لما سمع كلمة عامر: لو سمحت لاتقول خويتي !
عامر: وانت ليه معصب؟ شتبغاني اقول ...حبيبتك؟
فيصل: لاتقول شي ويالله جهز عمرك خلنا نمشي
::::::::::::::::::::::::::::
سالم يتصل على ساره :
ساره: الو نعم ؟
سالم : مرحبا
ساره: مراحب ...من بغيت
سالم: بغيتج
ساره: شكلك غلطان بالرقم
سالم: ليش هذا مو تلفون ساره
ساره: منو انت ؟
سالم: اسمعي ياساره انا رجال سيدا وماعندي خرابيط و...
ساره: هييييييي انت شتبي؟
سالم: ............
ساره: لوسمحت ترى انت ماتهمني كائنا من كان حتى لو تعرفني مو مهم عندي ولاعاد تتصل على هالرقم رجاء
وتسكر ساره التلفون بوجهه ........
سالم: ماعليه يالغاليه ...اصيدج اصيدج
::::::::::::::::::::::::::::
عامر: انت تقول ان هي عطتك هالعنوان ؟ انت متأكد منه؟
فيصل: أي والله متأكد حتى شوف هذي الورقه اللي عطتني
عامر: طيب جرب طق الباب مره ثانيه .....
في هذه الاثناء مر بجنبهم ولد ....وساله فيصل عن اهل البيت وقالهم ان اللي كانوا ساكنين فيه ماتوا وهذا البيت أجار مو ملك لهم
عامر: طيب اتصل يافيصل عليها واسألها
فيصل: ماكو غير هالحل ....الحين اتصل ...
يتصل فيصل على مها .....وكان بجنبه عامر
مها : الو
فيصل: هلا مها ...كيف الحال
فيصل: بخير
فيصل: اقول مها ...العنوان اللي عطيتيني لما كنا بالمطار
مها: شفيه؟ فيصل انت وينك اللحين ؟
فيصل: مها انا بالكويت ممكن تقوليلي انتي وين ساكنه
مها منصدمه : وشتسوي بالكويت؟
فيصل: ابغى اخطبك....ابيك ابغى اتزوجك انتي
مها: فيصل انت من صجك
فيصل: أي ....واذا انتي منتي موافقه علي قوليلي من الحين علشان ارجع مكان ماجيت
مها: انت بصراحه فاجأتني ...ليش ماقلتلي من زمان عالاقل عطيتني فرصه افكر
فيصل: تفكرين! تفكرين بإيش؟ مها الحين ابغى اسمع رايك ...يا أي يا لا
مها: اذا علي انا ماكو مشكله وين القى احسن منك؟ بس خالي...ظنك يوافق
فيصل: وليه مايوافق ؟ مها ترى كلنا عيال ادم وحوا مابينا فرق
مها: والله مدري اخاف يردك يافيصل والله اخاف
فيصل: اذا انتي تبيني ماعلي من اكبر راس...وخالك ماعليكي منه خليه علي ...والحين ممكن تعطيني العنوان
وتعطيه مها العنوان ويروح فيصل مع عامر لبيت خال مها ......
::::::::::::::::::::::

::::::::::::::::::::::
فيصل: وشخبارك ياابو علي
سالم باستغراب: هلا والله بخير
عامر: الصراحه ياابوعلي احنا قاصدينك انت بالذات وجايين من السعوديه مخصوص عشانك
سالم: خير فيه شي؟ لان انا الصراحه والله مااعرفكم ....واول مره اشوفك
فيصل: انا بدخل بالموضوع بسرعه لاني مااحب المقدمات....
سالم: وانا مثلك تفضل قول.....
فيصل:الصراحه انا جاي اخطب
سالم: نعم؟! ومنو تخطب؟.....اكيد انت غلطان انا ماعندي بنات للزواج
عامر: احنا جايين نخطب بنت اختك لخويي فيصل
سالم باستغراب: شنووو؟ ومنو انتم؟ وشعرفكم فيها؟
فيصل: انا لي ولد خاله بالكويت وكان ساكن عند بيت اختك الاولاني وهو اللي ذكرها لي
سالم: وليش خلصوا حريم السعوديه جاي تخطب هني ؟
فيصل:.............
عامر: ياابو علي احنا ماجينا نخطب الا عقب ماسمعنا عن اهلها الطيبين
سالم: ممكن اعرف منو انت؟
عامر: انا عامر وهذا صديقي فيصل
سالم: وانت يااخ فيصل ماعندك اهل؟ مالك ام وابو؟
فيصل: وليه اجيب العائله كلها معي؟انا اللي بعرس والا اهلي
سالم: اسف؟ ماعندي بنات للزواج
فيصل: طيب اذا انت خايف ان احنا ناس بدون اصل اسأل عنا
سالم: والله انك فاضي اطق درب للسعوديه علشان اسال عنك ...ليش ماوراي اشغال؟
عامر يحاول انه يتدارك الموقف: ياابو علي ...فيصل رجال طيب وهو يدور القرب منكم واطلب المهر اللي تبغيه واحنا حاضرين
سالم وهو يفكر:ها.....لا خلاص انا قلت لا يعني لا
فيصل: طيب انا بعطيك فرصه فكر على راحتك وبجيك عقب كم يوم
سالم:...........
فيصل: فمان الله
ويطلع فيصل وعامر من عند ابو علي ...اللي قعد يفكر في السالفه ....
:::::::::::::
نوره: وانشالله تبي ترفضه
سالم: لاوالله عندج غير هالحل؟
نوره: انا بعرف انت ليش خبل ؟
سالم: نوره شهالكلام؟
نوره: انت تبي البنت تطيح بجبدك ؟
سالم: الرجاجيل واجد وهي توها صغيره
نوره: اولا: البنت مو صغيره ...ثانيا: انا معاك ان الرجاجيل واجد بس تذكر ان بنت اختك المصون محد يعرفها هني على طول بغرفتها...انت ماتبي تفتك منها ...مصاريف ومسئوليه ...ياسالم والبنت تروح الجامعه وتطلع لا ومع رفيجتها ...يعني انت ماتدري وين تروح ووين تجي ....
سالم بعد تفكير: شقصدج يعني؟
نوره: اقول بدل ماتجيبلك فضيحه زوجها وافتك من شرها
سالم: بس مااقدر
نوره باستهزاء: شنو؟ ماتقدر !لايكون ماتقدر على فرقاها؟ انت متى عرفتها ...ياخي البنت هذي من جت بيتنا وانا احس انها هم على قلبي .....ياسالم لاتنسى ان امها لها نصيب في بيت اهلها وباقي الورث والاملاك ..كل شي لها نصيب فيه ...يعني جت من حظك
سالم: والله اني ماني فاهم شي من اللي تقولينه
نوره: ياسالم ياحبيبي انت لازم تصير فهيم ...لما انت تبعد مها خارج الكويت بفعلتك هذي تكسب اشيا كثيره منها انك تبعدها عن الميراث و...
يقاطعها سالم بعصبيه: اهلي بعدهم ماماتوا يانوره والا تبين تورثينهم وهو حيين
نوره: بعد عمر طويل انشالله ..انت شفيك ليش معصب...صدقني بتكسب كثير لما تبعدها
طلع سالم من البيت وهو يفكر بكلامها ....وفي السياره تذكر ساره ...
ساره بعصبيه: نعم
سالم: انعم الله عليج ...ليش معصبه؟ هدي هدي
ساره: لوسمحت انا كم مره قلتلك لاتتصل على هالرقم
سالم: احــــــبج
تنصدم مها من جرأته وتسكر التلفون بوجهه ...وهي تقول فقلبها شيبي هذا؟
..................................
........الجزء السادس:
مها: االظاهر انك ماعرفت خالي للحين؟
فيصل: والله يامها اني ماخذك ماخذك ...ومثل ماقاتلك بالمطار بالحلال
مها: ممكن سؤال؟
فيصل: تفضلي
مها: ......اهلك...يدرون؟
فيصل: مها انا بكون صريح معاكي ...
مها: وانا مابي غير الصراحه
فيصل: اهلي مايعرفون اني جاي الكويت
مها: ليش؟ فاطمه ماتدري؟
فيصل: لا وامي لودرت ممكن تعارض
مها: انا متفهمه لموقفها والصراحه ماالومها...فيصل ارجوك اذا زواجك لي يفرق بينك وبين اهلك ارجوك لاتكمل هالزواج وارجع لاهلك ...
فيصل: مـــســــتحيل اتركك مهما كان .....واهلي خسروني قبل اخسرهم
مها: فيصل انت شقاعد تقول ؟
فيصل: السالفه طويـــــــله اقولك بعدين انشالله لما نتزوج
مها: عندك امل ؟
فيصل: كل الامل ياامل حياتي
مها: فيصل اخاف انت شفقان علي وشايفني مسكينه قلت اكسب اجر فيها؟ ارجوك يافيصل لاتلعب بمشاعري وتعيشني بحلم حلو وبعدين تصدمني
فيصل: ايش هالكلام يامها والله ان كل اللي تقولينه مش على بالي انا والله حبيتك لذاك مش عشان ظروفك
مها: طيب انا عندي محاضره اللحين ...اخليك
فيصل: اقول مها ...خالك مافاتحك بالموضوع ؟
مها بحزن: لا....
فيصل: لاتخافين ياشمعة حياتي انا لك وانتي لي وانشالله اليوم انا عندكم
مها: حيالك الله بس ارجوك تحمل من خالي ترى لسانه متبري منه
فيصل: انا عشانك اتحمل كل شي
مها: والله تعبتك معاي اول وتالي
فيصل : تعبك راحه ....يالله مع السلامه
مها: مع السلامه ...
ساره: اعوذ بالله كل هذا مكالمه مو جنج نسيتيني
مها: ساره تعتقدين خالي بيوافق ؟
ساره: علمي علمج ...خالج هذا مايندرى شيدور تحت راسه
مها: والله اني امس اصلي طول الليل وادعي الله انه يوافق
ساره: انتي من صجج بتتركين ديرتج وتغربين ؟
مها: مافي احد يستحق اقعد عشانه
ساره: واهون عليج تخليني ؟
مها: ساره ترى للحين ترى ماصار شي ...وانا اتوقع ان خالي يرفض وبتم طول العمر مجابلتج لي ما تزهقين مني
ساره تضحك: يــــــــــارب مايوافــــــــــــــــــق
مها: ساره وثول لاتقولين جذي ويالله قومي لاتطوفنا المحاضره
::::::::::::::::::::::
سالم: خلاص انا بشاور البنت واردلكم خبر
فيصل وهو يحاول يخفي فرحته:الصراحه ان مامعانا وقت
سالم: خلاص انت تعال باجر انشالله
عامر: الله يكتب اللي فيه الخير
سالم يستهزىء بعامر: انشالله خير يالمرافق
سكت عامر مع انه كان يقدر يرد عليه ويوقفه عند حده بس شاف نظرات فيصل تترجاه يسكت
عامر: والله انه غاثني بس والله عشانك ساكت
فيصل: يامعود انا ماصدقت يوافق
عامر: مبدئيا بس
فيصل: شتقصد؟
عامر: اخاف يافيصل يحط شروط تعجيزيه
فيصل: كل مايطلب فيه انا حاضر
عامر: بس انت عليك سلفه كبيره وماتقدر تاخذ ثانيه
فيصل: ماعليك ادبرها اتسلف من اللي معاي بالدوام او من رجل اختي
عامر: افا يافيصل والله انك زعلتني وانا وين رحت؟
فيصل: انت اخ عزيز وغالي ....بس انت وشعندك ياحسره ؟
عامر: اللي تامر فيه وصدقني اجيبلك اللي تحتاجه
فيصل : ماتقصر يالغالي
:::::::::::::::
سالم: وهذي كل السالفه..... انتي شرايج؟
مها: والله ياخالي الشور شورك وانا مالي راي بعد رايك
سالم: الصراحه اني مااعرف الرجال بس والله شكله خوش ولد
نوره: اقول مها.....وافقي ترى مو كل يوم البنت يجيلها خطيب....." نوره كانت تبي فرقا مها اليوم قبل باجر مو كرها فيها ...كرها في ساره اللي شافتها خطر كبير عليها وعلى زوجها"
مها بقلبها"انتي مالج شغل": والله ياخالي الامر بيدك ...."ماكانت مها تبي تبين لخالها انها تبيه علشان مايشك بالسالفه"
سالم: وانا برفضه ...الصراحه مايصلحلج
مها وهو مصدومه: لــــــــــــيش؟
سالم: مو توج تقولين كيفك؟
مها: صح بس انا من حقي اني اقرر حياتي وانا حره فيها
سالم بمكر:انتي تعرفينه ؟
مها: وانا شعرفني فيه؟ بس ياخالي انا مابي اثقل عليكم اكثر والرسول صلى الله عليه وسلم قال بمعنى الحديث "من اتاكم من ترضون دينهم فزوجوه"
سالم: ههههههه يعني تبينه؟
مها: ............
سالم: ادري انج تبين فرقى بيتنا اليوم قبل باجر
مها تنزل راسها: ..........
سالم: السكوت علامة الرضا بس انا ماراح اوافق الا بشرط
مها متفاجئه: وشنووو شرطك؟
سالم: قدمي تنازلات...
مها: اكثر من اللي قدمته لك؟
سالم: هذا زواج مو لعبه بعدين ابيج تعرفين شي ماراح ازوجج من أي شخص مهما كان الا لما تنازلين عن كل المعاش لي ........اظنج ماراح تحتاجينه ...مايسوى عليج تجين كل شهر عشان 200دينار؟
مها: الظاهر انك ماتدري شكثر احتاج هالميتين ؟
سالم: والله عاد كيفج هالميتين تنفعني انا اكثر احتاجهم علف للدجاج والغنم اللي بالمزرعه
مها: واذا رفضت اعطيك؟
سالم: ارفض تزوجين طول العمر
مها تروح غرفتها وهي معصبه من كلام خالها..........انتهازي بشكل فضيع
:::::::::::::::::::::::::::::::::::